علاقة التلاميد ومول البوتيك علاقة كيف الأحوال الجوية مرة دافئة ومعتدلة صباحا (محدن كرنة الدين مافات زادت حت ) ومرة عاصفة مع غبار زوالا (إلين يموت الشهرولايخلص) ومريفية وشاعلة ليلا (إلين يتعاما صاحبنا ويتم ألا علي وجه) رغم زخات المطرمن خلاص الدين الموسمية عاكب (بورسات) الملطفة للجو
أنا كطالبة(أراني طالبة ألامن مولانه بعد لاتفهمونا غلط) البوتيك مهم في حياتي لابد نبدأ بيه يومي (من كد: أمبورو.... وبير....والدقديق والنحاس...للمواصلات....أول الشهرتكسي مية....آخرالشهرإنزل البركة في البيس)؛
والبطل المنقذ هو مول البوتيك من حالات الدفرة المزمنه والمتكررة .مول البوتيك شاهد علي العصر في الحي (الكرتي) يعرف أهل الفلان و أمناتهم وأولادهم ويعرف أملي أمعيزهم....ويعرف الجديان أينة خلقو....
خدمات مول البتيك ماهي فقط البيع والسلف لكن يسهدي عليهم الخطار الغادين لعل إعودو طافيين تلفوناتهم ومصرمكين مجرد يوقف حد حذ مول البوتيك يسول وينهوم أهل أفلان يكرد بكراهم مول البوتيك كون يعودو رحلو للقمر! وأيضا أحسان الخطار من عند البوتيك....وأحيانا يشترك في حسان الخطار ولديه سر ربات البيوت في الحي إلين يجو ضيفو ماهم مبرمجين أتجي ملات الدار وتكبظ ياااااااسر من لشربة(كوكا وفانتا وأراني واللبن وتغمز مول البوتيك وتقولو: ألي مانشرب منو أنردولك وهوطبعا حافض السيناريو وعد (لباش) بكل سماحة وإحاني ألخطار يمشو يرتب لباش ألي باقيين في (فلجديرو أوالثلاجة) ...مساعدة لأخته وكليانته وجارته ).
مول البوتيك أملي مهم للكواسة يكعدو عندو يشربو أتاي إلعاد أمتي ويزرك ألهم في (جيرت المعدن) ذيك رمز أهل لباتيك وهي جيرة من المعدن متوسطة الحجم متعددة الفوائد (يزرق) فيها ويزيف فيها لمعاعين و الورقة ويعطيها (لكويرات) الحي فهي مضادة للصدمات(عارف شي لمعيز جيرانو) وأثناء شد لخبار يعرفو تكوسو أعشه كل دارمن أهل الكرتيه متعشيين باش من خلال شري (التريكة) من البوتيك (لمكروني والشعرية)ولا(الخالص)ولا ما جاء حد يشري ولا شافو حد جاي من عند (ملات كسكس )معناها ماهم متعشين يلود لوحدين أخرين يطيح أعليهم.
لكن مول البوتيك قد يكون مسؤول عن إرتفاع ضغط الدم ونوبات الصرع عند الرجال المتزوجين إلين يجو يخلصو (دين الكرنه) ألي أخذت (لمرة)وأحيانا يكون كاتم أسرار الرجال عندما ينفكعلو وتكون ردت فعلهم كما يلي: يقللها موكلها هذي ألا 'لرظة'!!!!شوف بوي لاتيت تتخطي الملغ ألي قتلك وإلا مشاتلك (التركة )لااااااتعطيهم شيء!!؛
أحيانا تعود (كرنة الدين) هي سبب الطلاق وتنطرح عندو(براوة وثلاثين ألف )تقدر تعود مسلفة من عند مول البوتيك. وترفد (لمرة أدبشها) وتخلص مول (الوته) من عند مول البوتيك وتقولو:(فكتر!!) ذاك عليه هو(محروك أعظيلات ألي قد شاف!!!!....أنا أندور ألا حد يمونكني!!!). وطبعا مول البوتيك ماعندو مانع ومتفهم حالت (كليانو) العصبية ومتعاطف أمعاها إنطلاقا من أزمتهم المشتركة دارها أنكفلت و(كرنتو) هو أنكفلت أيضا.ويبقي مول البوتيك هو أهم شخص في الحي وعندو لخبار وألي ماشي وألي جاي أعليه ونصيحتي لكم حسنوا العلقات مع مول البوتيك وخصوصا الشويبات يكانو إتم عارف شيء ل للبن.
(وأنا بعد أنتم ألا طالبه الله يكثر كليانو الشريايه وبعد عنه أهل الدين ولكرن والبوهات يارزاق ياكريم).
Nouakchott Time
