من عادتنا أن الصغير يسمع كلام لكبير ويقلدو
من ساعة ألي يخلق أطفيل وهو يقلد بوه بكل شيء يلبس (دريريعة) و(يعكد أنواصيه) ويكمي (العودان) ويقول(إقصر أعماركم أسمعوا ذ ألي قلتلكم)أياك إعود كيف بوه والطفيلة تتملحف وتلعب (لوزار) وتنصب (التراب المبلولة) وتحطها وتقول(يخوتي لغد مافات أنحط وجايين الخطار) أياك تعود كيف أمها والناس أسغار متأثرين بالكبار
ظرك عادو الشباب ولغراس(مع إحترامي لحضرات لغراس والغرسات ) عندهم عالمهم وثقافتهم وحتي لغتهم الخاصة ألي مخترعينها ولا عندها علاقة بأماتهم ولا أباتهم عاد الغرس إلين يتكلم يحتاجو الوالدين لمترجم متخصص في اللغة (الغرساوية...أوالغاروسية..)أياك يفهمو كلامو إلين يطلب حد منهم شيء يعدلوه إلين يوافقو يقول ذاك (أوفه ولاتقول نيني)(نيني أص مصدرها مانعرف شنهو ألا أثرو من فعل نان ينين من نيووونيو نقلا عن لمشوشة(القطط))؛وإلين إعودو رافضين الطلب وأمابيين يسمعو يقولو(لاتصكعني أطلعت فراصي(علي أساس هو راسو كم من دور؟ وطلعت بسلالم أو الأصنصير؟....المهم إلين يقول الغرس أنك أطلعت !!!أحذر !!معناها أنك طلعت ويالتك أتنكز!!! ولا تتوشوش حياتك!!! قالو الغرسات))؛
وحد ماهو عاجبهم يقولولو (أنت صطلة!!!مانعرف أص يكانها صطلة الماء ولا صطلة لوسخ؟؟...وذ ألي فيه يشابه للصطل شنهو يكانو أدماغو مصطول؟ولا هو كاملو صطلة؟؟(سوال موجهة لمخترعينا لغراس)
لغراس عندهم تعبيرونظرية تختلف عن أجدادنا يعطينا بركتهم كانو يقولو أن:(أركاج إجنوه أهل لخل! لغارس قالو عن أركاج إجنن راصو!! ويعكب يوصل لمرحلة متقدمة من تجنان الراص يعود ينقالو(يفطح كنايتو! وبعدها يفطح كورايتو! والمرحلة الأخيرة هي (يفطح أشحم عينيه)....أنا مانعرف هذا ألي يفطاح شنهو تحديدا؟ ولا كيف يفطاح؟....المهم أن لغراس متفاهين علي ذاك بشكل (أفطح ومتساوي) ؛
لغراس إلين يعدل حد منهم شيء مبالغ فيه يقولك (أفلان نعتهالو طايرة ولا نعتهالو فايظة ....مانعرف هي طارت علين؟؟ ولا فاظت أمنين؟؟!
والغرس والغرسة ماتاو يحامرو الوالدين عادو عندهم شيء ينقالو:(اللوك!!...اللوك!!...هذا أمردة أكبيرة ومهمة...مرات تشوفهم روصهم أمرشكين كيفت حد بارك علي راسو قنفود(قنفذ)....وعادو إديرو جل! وليات في يديهم وأصراع وخواتم وذاك كامل أياك إعودو ظااااهرييين وحضااارة مع أن آبائنا ماكانو (سحامة حت) ولا قط يكون (يوع) واحد منهم و(كيم) يعدل (همو) وعادي وظاهر أملي؛
الغرس يبذل الغالي والنفيس أياك إعود مدررررر و كووووول ....ومثلهم الأعلي يقولولو(أفلان أمتيييييين!!).
وحد ماهو مهم عندهم يقولو(خرييير! وأنعيجة!...أنعيجة عارفينها ...أخرييير أص مانعرف تكد تعود أسم الخروف باللغة (الغاروسية).
ونعرفو أن القيم والمبادئ مصدرها الآباء والتوجيه والنصح هو دور الآباء إذا كان هناك إنفصال مابين آبائنا وأغراسنا تعود حتما هناك مشكلة لأن الغرس أصبح يتأثر بعوامل أخري خارج أهله مثل التلفزة والإنترنت والأصدقاء
فكيف سيلعب الآباء دورهم في التربية والتهذيب؟؟
هل العادات تمنع تقارب الآباء مع أبنائم
وهل مطلوب من الآباء أن يحاولو فهم لغة أبنائهم أم أن الأبناء تجيهم ألا العين الحمرة ونكيب إلين يحماو؟
هذا لختلاف وتباعيد بين آبائنا وأغراسنا شنهو سببو؟ في رأيك؟
(مررريانه ذ من العربية الحامية! لاتقول شيء جاوب وأعطينا رأيك ولا فطح راسك قالولغراس)
Nouakchott Time
